Sunday, September 24, 2006

أول صيام

دايما كل سنه بأول رمضان خصوصا الخمس دقايق الي قبل اذان المغرب انا واختي نضحك على سالفه قديمه
اول يوم صمناه انا واختي ومن قرادة الحظ صيامنا حزتها كان رمضان بعز الصيف و يوم طويل وحر موت طبعا هالسالفه كانت بسنة 73 أو 74
اشششششش أدري قبل لا ينولد الكثير منكم يامعشر بلوق بوست
المهم نرجع حق سالفه آخر خمس دقايق قبل الأذان وصل فينا الحال للبجي لأن أول مره يحوشنا عوار البطن من اليوع والعطش. والله كان عذاب اول يوم صيام كان كل واحد فيننا يصبر الثاني وخرعه انا ابيها تفطر قبلي وآنا بعدها عشان اعايرها بس روس يابسه من لعناد صمنا يومين والثالث لا بدت العياره الي بعد الريوق يبقق عيونه وقول اخ نيسييت و كليت يبه يصير اكمل ؟ و دايما ناسين و نشرب ماي والله خوش صيام . بس والله ايام اتمنى انها ترد
وأتمنى من كل بلوقر يقرا البوست يكتب عن معاناة اول يوم صاموه بحياتهم

8 comments:

  1. بالنسبه لي اول يوم صيام كنت مره شكبري مو ياهل لأ اهل ما كانوا يرضون اصوم لأن دمي ضعيف حزتها..وبيني وبينك ابيها من الله
    ومع هذا كنت انطر الفطوور نطره وامي تلهيني
    تقولي تمضمضي مادري شنهو
    يا عمييييي فطرت ..وكليت بالمدرسه ورديت البيت فاطره شحليلي
    وما صمت رمضان بتمامه الا يوم صرت مكلفه شرعا بصيامه
    افشل صح
    لول

    ReplyDelete
  2. ههههههههههههههههه سالفة تفطر قبلي عشان اعايرها وايد نسويها ههههههههههههههه

    تبي الصج ما اذكر اول يوم صمته هههههه

    ReplyDelete
  3. اذكر ايام الغزو .. كان اول مره نصوم انا واختي التوأم وحزتها كان عمري تسع سنين
    فكنا اشلون نفطر ما ناكل شي اول شي .. عقب ما نتفق على انه نفطر انتعازم منو يفطر اول شي
    عقب ما نتفق
    بس اقولها انا يلا نقول مثلا يا حماره .. فنفطر على هذه الطريقه

    ReplyDelete
  4. ماشاءالله اي الكل عنده قصه ما عدى بعض الناس حايشهم فقدان للذاكره

    عتيجه
    سالفة التمضمض ما فكرنا فيها لأن حزتها ماكو مدرسه :( عطله صيفية

    كويتية
    اكيد؟ ماتذكرين؟

    سمايل
    ذكري اختج تقول ماتذكر شي بس على فكره ما طرت على بالي اني اقول حق اختي ياحماره لان حزتها الصيام كان عن الاكل بس ههههههه

    كتي
    يامسكينه عدوى كويتيه حاشتج؟ سلامات سلامات اجر و عافيه و حياج الله بالبلوق المتواضع

    ReplyDelete
  5. هاو @@

    شسوي عصرت مخيييي ماكو فايده

    انا بعرف سجى اشلون تذكرت ههههههه مع ان احنا بنفس العمر تقريبا بس اشلون تذكرت @@

    ReplyDelete
  6. هههههههههههههااااااااي حلووة قصتج وااااايد حلوووة

    بس انا وحده اخبر اول مرة سنة لى اصوم كنا بالابتدائي نصوم نص النهار ههههههااي ونفطر بدري قبل الكل بساعات

    او نصوم او ماياذن الظهر..كانت بداية على شان نتعود

    بس بعدين صمنا عادي وماتذكر بالضبط ايش اللى صار

    بس اتذكر لما احس بالجوع اطلع برى بحديقة بيتنا واجلس العب على شان انسى الجووع هههههاي

    ياليت والله ترجع ايام الطفووولة مررررة حلللووة


    اتمنى لك ايام حلوة

    تحياتي
    مضيعه بيتهم وبلوقها

    ReplyDelete
  7. الله يقطع ابلييسك :)...

    اذكر اول مره صمت كنت مستانسه اول شي.. واسم الله علي كنت احوس والعب وايد.. وخبرك لصيام ما يبيله مهايل جذي واللي زاد ان مثل حلاتك كان رمضان بالصيف وعز الحر.. المهم اذكر عقب الحوسه والعب ولمهايل طول اليوم وقبل الاذان بساعه قمت احوس في المطبخ ورى الوالده " يماااااا راسي يعورنب.. يماااا دايخه... يمااا بطني يعورني ..يماااا عطشانه...يماااااا يوعانه.... يمااااا افطر!!!" ونصه تمثيل عشان اكسر خاطرها!!

    والوالده حاقرتني وما ابحلجها الا هالحجوه "كيييفج.... طلعيييي"

    اخر شي و قبل الاذان بربع ساعه قصصت رقييه وانسدحت بالصاله جبال التلفزيوون وماسكا الرقيه وامندندلتها فوق حلجي .. وليين مرت الوالده تبنجحت وقلت " يمااااا.. افطر؟!!"وهي حاقرتني .. أخر شي هالرقيه الدايخه طاحت بحلجي وكملت على باجي الصحن!!

    ReplyDelete
  8. ههههه
    والله كنت ازرق بالمطبخ على طول كل عصرية الهم من البطاط والتشريبه
    :)

    ReplyDelete