Sunday, December 18, 2005

موبايلي حزة الدوام

وانا بالدوام لاهي بستين الف شغله طبعاً كالعادة يرن الموبايل و كالعادة الأهل. طبعاً لازم اذكر الله على مشروع المصيبه الي هاف علي راسي!!!
طبعاً الرنه حاطها رنة مطافي لأن اهلي مايدقون علي حزة الدوام الى حق شيين .
يا مسوين حادث يا مظيعيين .
اشيل الموبايل وسمع إذا الصوت مخنوق يعني حادث واذا صياح ونياح يعني مظيعين.
اشيل الموبايل وإيدي على قلبي الو نعم ؟
مناحه و دموع و تنشق ؟
أشوه بس مظيعيين
هلا فلانه شفيج؟؟
مادري لف علي واحد و خلاني الف اللفه الثانيه ومادري ماعرف شلون ارد.
يعني مظيعه؟
اييييييي
وينج فييه؟
مادري !
أي منطقه؟
مادري!
وين رايحه ؟
الجامعه
والحين وينج ؟؟؟
مادري
شنو يمج؟؟
الإشاره
شنو بعد ؟؟
كود رمل
نعم ؟؟؟؟؟؟ شنو شنو شنو يمج؟؟
والله اول مره احس ان دمي قام يغلي وفور وني بموت
المهم اقريلي اي لوحه جدامج
اييي كا لوحه مكتوب عليها محافظة الأحمدي.
ساعه على ما نوصل اشاره و اخيراً
بس خلاص دليت ارد البيت نفس طريجنا وحنا راديين من الشاليه
قظيتي عين الديج مستانسه مال من يدفنج تحت كود الرمل الي بدليني وينج فيه انتي خلج بس ترحين الجمعيه و كافي عليج.
بالله عليكم اكو ناس ليلحين مايدلون ؟؟؟
الجامعه بشويخ والاخت رايحه الاحمدي
هاذي سالفه من سوالف موبايلي حزه الدوام

13 comments:

  1. السلام عليكم يا شاب يا لطيف يابو دم خفيف :)

    اغلب الحريم يسهون بالطريج -وانا بالذات اسهى بشكل غير عادي...

    لدرجة اني وصلت حدود السالمي! بقدرة قادر!!

    ReplyDelete
  2. :)
    الله يخليك لهم قول آميين

    ReplyDelete
  3. بسيطه
    محافظة الاحمدي وايد اهون ههههه


    العنان
    تسلمين ويخليييج لهلج

    ReplyDelete
  4. لوووووووووووووووووول


    انا اعرف وحده صارلها اكثر من 15 سنه واهي ليلحين ما تدل لووووووووول

    الله يعينك بس ...:)

    ويخليهم لك ويخليك لهم....:)

    ReplyDelete
  5. اي عادي

    انا اول ما سقت وصلت الصليبية

    صارلي 3 سنين اسوق و لي الحين اضيع لمن اروح السالمية و ما أدل شي كلش ملش

    ما ادل غير منطقتي و الجامعة فسالفة أهلك مو غريبة علي :)

    ReplyDelete
  6. لووووول
    الله يخليهم لك
    ويخليك لهم

    ReplyDelete
  7. :خوش سالفه والله بس عاد تصدق ان هالسوالف تحسس الانسان بأهميته عند اهله
    ولو ما انك دلول ما دقوا عليك
    معناته انت مهم
    المفروض انك تستانس ما تنزعج
    احسن من اللي اهلهم يبيعون ويشترون ومايخذون رايهم :p
    والله يسمت فيك

    ReplyDelete
  8. لووووووووول
    ايه للحين فيه ناس ما يدلون

    واذا اهلي غيروا السواق اروح فيها انا

    مره جيت بروح للجامعه ورحت للبطحا

    البطحا هذي الله يسلمك منطقة الهنود عندنا بالرياض يعني مافيه ولا نتفة سعودي

    كلمت على اخوي وهو ناييم لقيت تلفونه مقفل
    شوي دق علي يقول فزيت من النوم حاس انك بتضيعين اليوم لان السواق جديد

    قلت له :(
    طبعا بدينا بالتهزيييئ اللي ما يخلص
    وكنت معاه على التلفون الين وصلت باب الجامعه
    والمصيبه
    اني اكتشفت توني ماره من عندها بس ما كنت ادري انها جامعتي


    تكفى نبي سوالف عن تلفونك بالدوام
    كثر منها

    ReplyDelete
  9. بسم الله الرحمن الرحيم ههههه محافظه الأحميدي وايد أهون !! الصليبيه والبطحا و السالمي؟؟ خلاص ياجماعه ال جي بي أس علي بييب لكم كلكم

    ReplyDelete
  10. انسان بسيط

    أنا مثل الي قالت عنها كويتية لي 15 سنه اسوق ولا ادل

    اذكر الله الله يخلي لنا ابو العيال سوبر مان للحظات التدلي

    تحياتي :)

    ReplyDelete
  11. عادي آنا وحدة لي الحين ما أدل
    :p

    ReplyDelete
  12. هههههههههههه

    ذكرتني يوم بروح السالمية

    مادري شنو اللي خلاني أضيع بخيطان



    عادي ترا الحريم مو ذاك الزود بالخرايط

    انا وايد أضيع داخل منطقتنا نفسها

    :P

    ReplyDelete
  13. صباحك سكر

    15 سنه و ليلحينما تدلين؟؟ الله اهداج ما بقى شيء على التقاعد

    ra-1

    عادي عادي

    نون النساء

    هههه خيطان عاد اكيد انتي رايحه السوق او قهوه؟؟

    ReplyDelete