يوم حافل

من ضيقة الخلق دقيت على بوراشد" اخو دنيا " وصديق عزيز لي من 1985

اهم شي بوراشد شعندك؟؟؟

والله ماعندي شي ليش آمر ؟؟

شرايك؟؟؟

يالا مرني ناطرك

بسم الله انطر خل اكمل كلامي

جان يقولي ابي سوق البشوت ابي فروه حق البر

ورديت عليه هم انا ابي

ومريته ورحنا سوق المباركيه

و تمشينا و ضحكنا

ويوم وصلنا المحل

طلع يبي فروه صوفها طبيعي

جان اقوله : بوراشد ان لبست هالفروه يومين ؟؟؟
بذمتي بتبمبع علينا

شم الريحه

ورد علي عادي عادي حق البر ماني رايح لعروس ا

اهم شي غير رايه بس شرينا حق عيال خواتنا سديريات حق بو سنه ونص

جنهم صج

وطلعنا ومرينا صوب سوق السلاح

طبعاً انصدمت باسعار الكلونيات

انا شاري كلونيتين وحده ب 39 دينار والثانيه ب 36 دينار

وشراهم رفيجي وحده ب 25 والثانيه ب23.5 دينار

عادي عادي كل تعلومه بطراق

وختمناها بعشا كلينا جبود و قلوب بالمطعم الراقي " الرعيل الأول" والي مايعرفه؟

اهو عباره عن قرقور صغير والمنيو فيها بس طبقين اساسيين

1 ماعون جبود

2 ماعون قلوب

لبن

بس ماكو شي ثاني غير راسين بصل وليمونه وخبز ايراني بايت

وبعد العشا طفينا انا وبوراشد

من البصل الي كليناه شتتوقعون يعني؟

بناكل جيزكيك؟؟ مع لجبود والقلوب؟؟؟

اكيد راسين بصل

وطول الدرب طاخين مالنا خلق نسولف

الكل لايعه جبده من عمره

ان تكلم انا دخت وان تكلمت اهو داخ ههههه توبه

فقررنا نختمها بعصير جود تخف المعاناة

واخيرا مرينا محل العصير بجمعيه القادسيه

انا طلبت عصير تين شوكي و رفيحي هم طلب وياي

بس بوراشد اشتهى يشرب عصير منجا بالحليب وشوية موز

باعها بوراشد

واحنا ننطر دش الاخ سونيك (واحد شعره مقنزع)وللعلم المقنزع نوع من انواع الحمام

و طلب عصير برتقال بالسنيكرز؟؟؟؟

وانا مع لساني الفالت

شنو؟؟؟؟؟؟

برتقال وسنيكرز؟؟؟

حشى خلاطة سميت مو معده

ودي اقوله ليش ياخوك ترى ان الستر زين؟؟

ان شربت عصيريك هذا؟؟ بتذبح خلق الله

لأنه مشروع عوار بطن

بس هونت من شاف كشته

كيفه اهو الي جاني على عمره

المهم و دش الثاني وزاد الطين بله

ابي صمدي و اخو عزوز ؟؟؟

جان انادي بوراشد

بوراشد بوراشد؟

ورد علي هلا

سمعه؟

المسكين مضيع اخوه؟؟

والله كان ودي ادور عزوز وازفه شكو مضيع اخوك؟؟

يه!

اخو عزوز طلع عصير؟؟

ماقدر اسكت

جان اقوله وانا ابي عصير اخت ميثه و مطيلق

سحبني بوراشد امش امش ميثه عاد صج انك شايب

يعني الناس تروبيكانا ولا بينا كولادا

مو اخو عزوز و عبود

من صجهم ؟

يعني الجهرا شسمونه عصير اخو شليويح؟

و بالصباحيه؟؟؟ عصير اخو جمعان؟

و الرميثيه؟؟؟ عصير الخاتون؟

و حولي؟؟ عصير ابو العبد؟

والسالميه اخو لمياء بنت تفيده

بس ماقول

الا صج الجنون فنون

وختمنا يومنا بالدوانيه لعب هاند وبوراشد

مسكين طاحت ايده وهو يشيل

وسلامتكم