Saturday, March 21, 2009

الويك اند

طبعاً ننطر الويك اند عشان انهج و ننحاش عن الزحمه واللويه
و الحين اخر فتره نستمتع فيها وهي البر
موسم السرايات  ياي و الهوى والعفسه 
والبر مافيه غير المخفات الي بعد الخيام
كون مخيمنا دائم  و من ست سنين ماكو مشكله والحمد لله
هالسنه بدايتها ماتبشر
وصلنا المخيم و اغلبنا ربع من سنين انا اتكلم ربع من 
 ١٩٨٥
الله لايغير علينا
اهي مقالب وناسه صج جو ينسيكم تعب الاسبوع كله
تيمعنا و واحد قالنا ترى لقينا حيه
ضحكنا محد عبره سنين ماشفنا شي بالمنطقه الي احنا فيها
عقارب ؟؟؟  ايي متروسه 
شبث ؟؟  ايي وايد 
بس حيايه؟؟  ماشفنا
و عادها لقينا حيه و عيالها
اي العب يا بو فلان
 جم النزول
جان اييب الحارس واحد من اعيالها
مذبوح 
والقطو ماكل نصها
المهم الشباب قلبهم ميت ولا ردو عليه ناطرين هند الجيكر 
اهم شي بعد ما خلصو تفرغو للسالفه
وين لقيتوها
ليش ذبحتوها جان خليتوها حق صاحبنا يصورها
و بعدين قامو و شافوها مدفونه
والله تخرع اطول من متر
 طولها  تقريبا حول المتر و نص
بس مسكين الحارس من الخرعه صار اسد
  لعن خير الي يابوها بلوح
الله يستر الايام اليايه شنو بنلقا
 اكيد بلاوي
الحافظ الله ان شاء الله
بس والله تذكرت مواقف قبل بالشاليه
  لما تصرخ خالتي ولا امي  حيه 
ههههه كنا صغار و شوف العفسه الي تصير الي يايب الشبل والي يايب عصا 
اجرام احرام
طبعا ولا مره بطلنا المخزن و مالقينا فيه حيه
 وكان اونس شي ايام البرد
 تنظيف المخزن سهل نلقا حيايه متيمده من البرد
وبنيدر و حد حماره متروسين حيايه والحين البر يالله تلقون فيه حيه وحده



2 comments:

  1. صباح الخيييير
    سؤال يطرح نفسه .. شنو الشبث :\ ؟
    جان صورتو الحيه :)
    انا من جذي ماحب اروح البر اخاف من هالسوالف والاشياء
    عقارب خنافس اشياء تدبي بالليل وتوسوس :(

    ReplyDelete
  2. الشبث جمع الشبثه والشبثه نوع من انواع العناكب الصحراويه واسمها بالانجليزي camel spider

    ReplyDelete