Sunday, October 10, 2010

عايله بلاليط





مساكم الله بالخير

بصراحه بخاطري شي و بقوله
ليش ربعنا كرماء بكل شي
الكرم حتى بالحجي
انا اقول شي و كل واحد يفهمه و ينقله على هواه
وصارت لي بوفاة خالتي الله يرحمها
كنت بالبر و ياني تلفون من وحده ان خالتي الله اخذ امانتها
فردي ياجماعه الوالده راعية مرض 
لحد يكلمها الحين خل اوصل البيت واكلمها 
  وكيفكم بعدها
المهم ماوصلت حزة المغرب الا الخبر
واصل من فلانه الا فلانه عن فلانه وعلى ماوصل الخبر حق الوالده ان انا طارد نص خلق الله
 ههههه
والله صكو على قناة الجزيره
وهالسالفه ذكرتني بنكته العايله الضاربه
و نصها كالآتي

يقولكم ان في عايله كلهم صمخان
فواحدمن ربع الابو دق على الابو
الصديق : الو بوفلان  ترى احنا متيمعين بالديوانيه
 الاب : رد عليه خييييييير؟؟؟؟
 الصديق : اقولك متيمعين بالبييييت  ربع الديوانيه
الاب: خيير  ثمنو البيييييت  ب ٨٠٠
الصديق : شنو ؟؟؟
الصديق : اي ٨٠٠ ؟؟؟
الاب : يزاك الله الف خيير 
ولا بدخلت زوجه الاب وام العيال 
الزوجه : شفيك يافلان عسى ماشر
 الاب: باركيلي ثمنو البييييييت
الزوجه :  تصرخ  ياويلي بتزوج علي و بتييبها البيت؟؟؟   هذي اخرتها
ولا بدخلت البنت يمه شفيييج   عسى ماشر
 الزوجه : ابوج ابوج بتزوج علي و بييبها البيت
جان تصرخ البنت حرااااام عليكم   مابي اتزوج مابي اتزوج الزواج مو غصب
وركظه حق اليده  اديده اديده شوفيهم مايخافون من الله بيزوجوني غصب
جان ترد اليده شوفو عاد تبون بطاط و بيديان ولا فلافل انا مشتهيه اكل بلاليط

فربعنا بنقلون الاخبار والسوالف مثل عايلة البلاليط  و كل واحد يسمع و يفهم على كيفه
وسلامتكم

5 comments:

  1. بوستك مضمونه "السطر قبل الأخير" ..
    والله يسلمك ..


    ويخوك حاول تسوي مدونتك "جذّابه" أكثر من حيث القوالب واضافة الهاكات والكودات ..

    ReplyDelete
  2. ههههه على ايدك علمني اخوك عليمي بهالسوالف

    ReplyDelete
  3. Anonymous1:47 PM

    لازم ينقلون المعلومة، بس صحتها مو مهمه بالنسبه لهم :)

    يعطيك العافيه

    ReplyDelete
  4. سبحان الله خصوصا بسوالف الموت و المرض و الطلاق يوصل الخبر مثل البرق ..لا اله الا الله ..البوست ذكرني بوفاة الوالد الله يرحمه و شلون وصل لنا الخبر صج أيام ما أتمناها حتى لعدوي ..الله يرحمه و يغفر له و يرحم خالتك و جميع موتانا سبحانه الغفور الرحيم..

    ReplyDelete
  5. Princess
    اختي بريبسيس كل واحد يفهم على هواه ويسمع الي يبي يسمعه بس
    الله يعافيج

    هــديل

    امين

    ReplyDelete